跳到主要內容區塊

列印 轉寄 Facebook(另開新視窗) Google(另開新視窗) Twitter(另開新視窗)
版品

<< 回清單列表
《臺江臺語文學》季刊(第1期)菅芒風華-許丙丁文學專題
《臺江臺語文學》季刊(第1期)菅芒風華-許丙丁文學專題
  • 作者
    施炳華總編輯
  • 出版日期
    2012.03.15
  • 出版單位
    臺南市政府文化局
  • 分類
    文學
  • 定價
  • ISBN
    issn:2227-748-X-03
內容
【發行人的話暨臺江臺語文學雜誌創刊賀詞】
春雷一聲響

臺南自古以來文風鼎盛,人文薈萃(huē-tshūi),許丙丁、吳新榮、王育德、葉石濤等等濟濟文學名家的努力拍拚,予「文化古都」有機會進一步成做「文化首都」,臺南嘛以豐沛(phong-phài)奢颺(tshia-iānn)的文化家伙(ke-hué)升格成做直轄(hat)市。

臺南的地方政府長久以來攏共(kā)傳承古都文化當做是大代誌來看待,清德自上任以來,嘛推動「書香大臺南」計畫,鼓勵市民讀冊;編輯出版「臺南作家作品集」,提升文學創作的品質,推捒(sak)文學研究。這馬(tsit-má)咱閣出版《臺江臺語文學》季刊(kuì-khan),發揚臺江文化,保存、發揚臺灣語文的多樣性;予臺語會當流通推廣;予臺灣人重新認識臺語文學的價值,增加欣賞臺語文學的能力,提高臺語文學的閱讀人口。咱用實際行動宣示,以政府的力量支持鼓勵發揚本土文化的文人雅士,展現大臺南地區豐富多元的文化基底,真正做到「立足臺灣,放眼國際」的目標。

本雜誌的創立,會當講是頭一擺由公部門出刊臺語文學雜誌,嘛是咱成做臺灣囝孫一个重要的工課(khang-khuè);雖然真濟前輩規世人研究臺語的書寫方法,逐家有一寡無仝款的意見,總是閣較向望各位先進會當暫時放下成見,先做伙來拋磚引玉,創造臺語文學的風氣,才沓沓(tāu-tāu)仔共臺語文字標準化,加速臺語文的流通。

清德進一步希望逐家以「全球思維,在地行動」的新頭腦,深耕紮(tsah)根本土文化,唯(uì)自我肯定、重新定位、彰顯特色,到迎向國際,將全球化融入在地化的精神,達成全球在地化的目標;閣以深耕本土、行銷全球的理念,實現在地全球化的理想。總體講來,本土化佮全球化本底就是共(kāng)一件的代誌,只不過是看的角度無仝(kâng)爾(niā)爾。

這馬咱攏是鬥陣創造臺灣文學的友志,期待臺南市 (tshuā)頭霆(tân)的這聲春雷,因為有逐家努力掖(iā)種、沃(ak)水、壅肥(ìm-puî)、挲(so)草,會當稻影大模,稻穗頕(tàm)塗,五穀豐收,將臺灣豐沛奢颺的臺語文化捒上(sak-tsiūnn)國際舞臺!

臺南市 市長 賴清德

【社長的話】
臺灣頭一聲

臺語是世界幾落千萬種語言內底排名第廿四大的語言,也是美國NASA(太空中心)佮人相借問的六十種語言之一。有真濟學者公認臺語是一種精密、豐富、優美、典雅閣高深的文明語言;也有音樂家講臺語是一種兼有藝術性、音樂性的語言。

遮爾(tsiah-ní)媠(súi)閣迹爾好的語言,因為過去政策的錯誤,禁止臺灣人講臺語,致使臺語干焦(kan-na)會當(tàng)佇民間流傳,毋捌上(tsiūnn)過正式的場面,加上電視極力醜(thiú)化臺語、扭曲臺語,煞(suah)予人誤解臺語是粗魯無水準的,甚至誤解臺語是「有音無字」、「有話無文學」的歹印象。毋但(m̄-nā)少年人袂啥會曉講臺語,連大人嘛講袂輪轉,莫(bài)講臺語文學矣,所以「臺語文學」行入「捌的無幾个,毋捌的嫌鎮地」的悲境。

臺南是文化古都,是臺灣文化的發源地,也是臺語文學的發源地。早期有許丙丁、賴和 頭,孤單開拓臺語文學拋荒(pha-hng)的田園;後來有《鹽分地帶文學》帶動臺語文學起飛;紲落來由民間團體出錢出力,創辦一寡仔臺語文學的雜誌,毋過到目前為止,猶毋捌由公部門來出版臺語文學的刊物。

咱臺南的縣市政府,一向攏真支持臺語文學,也替臺語文學咧掖種釘根,所以自大臺南合併以來,文化局為著欲打造臺南成做臺灣的「文學城市」,整合原臺南市《南臺灣文學作品集》佮臺南縣《南瀛作家作品集》,編輯新的《臺南作家作品集》,提升文學創作水準。這馬(tsit-má)閣開臺灣頭一聲,由公部門創辦《臺江臺語文學雜誌》,希望臺語文學會當深入民間。予咱少年一輩,逐家毋但會曉講臺語,閣會曉讀臺語文;毋但會曉讀,閣會曉寫臺語文學。

臺南市政府文化局 局長 葉澤山

【總編輯序】
菅芒風華

三、四百年前的臺南外海,唯(ùi)南到北,遠遠排列七塊狹(ue̍h/e̍h)長的小島,連接熱蘭遮城(Zeelandia就(tio̍h/to̍h)是這陣[tsit-tsūn]的安平古堡)、鹿耳門,共臺南外海包起來,這(tse)就是「臺江內海」。彼(hit)當時臺灣南部是予(hōo)荷蘭人(1924~1962)佔領, 佇(tī)外島中點起造熱蘭遮城,閣安大炮向外。來講紮(tsah)營佇厦門的鄭成功,伊佇1661年4月率領350隻戰船欲按天險惡(oh)渡的鹿耳門登陸,拄撞滇流(tú-tn̄g tīnn-lâu)[漲潮],tsua̋n順利按北汕尾上岸,抄後斗攻入普羅民遮城(Provinta就是這陣的赤嵌樓),荷蘭苦戰8個外月,最後投降離開臺灣,臺灣歷史進入明鄭王朝。

鄭成功憂國憂民,隔轉(tńg)年煞(suah)來過身, 囝鄭經採用諮議參軍陳永華的做法,佇臺南起孔廟,招學生(生員)來讀冊,實施科舉制度。鄭成功是閩南泉州府南安人,陳永華是泉州府同安人,所帶來的三萬七千个將兵大部份是泉州人;亦就是講,臺灣的漢文教育,是按臺江安平的泉州話起蒂(tì)。臺灣話是閩南泉州話佮(kap/kah)漳州話透濫(lām)的。

咱講「臺灣話」(臺語),是「臺灣閩南話」的簡稱,無包含原住民語、客語。臺灣話有經過長期的文字試寫階段,自1920年的臺語文論戰到今(tann),臺語文猶(iáu/iá)無完全大漢獨立,書寫文字猶無一致,嘛猶無受社會大眾的普遍認同,臺語同仁雖罔有出刊物,一來是各人堅持家己的主張──漢字?羅馬字?有無共(kāng)款的寫法;二來無經費,攏是逐家窮(khîng)錢來出版,脫袂開「小眾書寫(文學)」的困境。

2012年的3月天,「piàng!」平地一聲春雷,天頂金光閃閃,地下菅芒已經紅:臺灣有史以來頭一本由政府出版的臺語文學雜誌《臺江臺語文學》上(tsiūnn)市--矣(à),佇民主聖地的臺南市。

菅芒花,白無芳,冷風來搖動。無虛華,無美夢,啥人相疼痛。世間人,錦上添花,無人來探望。只有月娘清白光明,照阮的迷夢。……

臺南文學家許丙丁作詞的〈菅芒花〉,旋律優美,意境幽遠,夆(hông)傳唱幾落十年。秋冬時節(tsueh/tseh),菅芒花佇山坡頂、溪仔墘(kînn),一簇(tshok)一簇、開著長長紫紅色的花穗,佇微風中搖來搖去;慢慢仔就轉(tńg)做黃塗(thôo)色、鳥鼠色,最後是純白色,滿山遍野,是偌仔媠(súi)咧。伊是足普遍的野生植物,花莓(m̄)隨風飄,毋管是飄落山跤、石縫,就落地生根,發葉開花,性命誠韌(lūn)。

臺語的勼忍(kiu-lún)、生湠,參菅芒花的飄散、釘根、開花有相仝(kâng)的命運。《臺江臺語文學》發行的意義佇遮:臺灣閩南語教育開始佇臺江畔,臺語文學的菅芒開佇府城,有史以來由政府機關出版的第一本臺語文學雜誌出現佇臺南。 這个(ê)刊物,參以早臺語同仁家己出版的雜誌有啥乜(siánn-mih)無仝?

1「喙(tshùi)講父母話,手寫臺語文」,建立臺語作家的尊嚴。
2有理想、有堅持,欲建立臺語文書寫的規範。
3是臺灣本土的呼吸,按臺南出發,欲行向全臺灣、全世界。
4有根源、有傳承、有發揚。文化、文學的發展,有伊的傳統、延續、時代性,毋是斷裂、雄雄puh--出來的。

這本雜誌的內容有歷史的延續,包含三種:古典文學是欲挖(óo)掘臺灣文學前輩的臺語文學表現(以漢詩為主);民間文學是以人民日常生活的種種表現,包括口傳、唸唱的書面化(諺語、笑話、故事、褒歌、歌仔冊、歌仔戲劇本……);現代文學就是現在文學家用臺語文創作的詩、散文、戲劇、小說,佮文學賞析、文學評論等等。

三、四百年前的臺南安平沿海有「海吼(háu)」的記載,海湧衝來,像山崩、像七鯤歕瀾(pûn-nuā)、像雷公天頂舞,幾落日吼袂煞。今(tann)─《臺江臺語文學》的發行,就是21世紀臺江畔的「海吼」,予逐家認識、看重,閣發揚臺語文學。
2012年2月20日施炳華寫佇臺江畔