跳到主要內容區塊

列印 轉寄 Facebook(另開新視窗) Google(另開新視窗) Twitter(另開新視窗)
版品

<< 回清單列表
《臺江臺語文學》季刊(第7期)唸歌佮歌仔冊文學專題
《臺江臺語文學》季刊(第7期)唸歌佮歌仔冊文學專題
  • 作者
    施炳華總編輯
  • 出版日期
    2013.08.05
  • 出版單位
    臺南市政府文化局
  • 分類
    文學
  • 定價
  • ISBN
    issn:2227-748-X-08
內容


【本期目錄】

總編輯的話
05 我來唸歌予恁聽 臺灣文化鬥陣晟 施炳華

唸歌佮歌仔冊文學專題
10 歌仔曲藝傳久遠 說說唱唱勸世間  榮獲國家文藝獎的說唱藝人──楊秀卿(華文) 竹碧華
24 歌仔冊的版本與體式(上)(華文) 陳兆南
38 臺灣歌仔冊《最新運河奇案》的文學之美 方耀乾、柯榮三
57 呂柳仙《十殿閻君》的歌喉 蕭藤村
79 按道光版本目錄究勘歌仔个源頭 杜建坊
95 「歌仔 」佇大學臺文系欲按怎教?
 ──用「台灣民間文學歌仔資料庫」來實踐 丁鳳珍
103 唸歌獨愛江湖調 月琴伴唱傳歌謠 施炳華

文學評論
112 輕鬆開講話史詩 林央敏
123 歪縒(tshuãh) 的臺灣教育:
淺論方耀乾的〈查某囝的「國語」考卷〉 柯盈如
130 〈台灣翠青〉詞曲

現代詩
132 樹仔哪會佇春天落葉 岩 上
134 長恨 黃勁連
136 Tī 高雄──海陸合鳴ê 港都進行曲 莫 渝
139 藍色ê溪──《人面冊ê 季節》28 李勤岸
140 一个採購靈魂的都市 方耀乾
142 徛佇雪域的山頭──西藏十五帖 黃文博
149 牛肉崎 利玉芳
151 啉八卦山的咖啡 康 原
153 清幽 陳金順
154 Facebook ( 二):安定的時代 何信翰
155 高鐵 李長青
156 臺江內海風雲5 ──最後的潟湖 陳正雄
158 一个「khioh 落米仔」ê 真心話 楊振裕
161 澹地公園早起 王希成
162 故事按怎來 蘇 善
163 兩岸的誓盟 劉惠蓉
164 落番 周俊安
165 舉祭 邱冠中
166 跳針ê 留聲機 林育如

囡仔詩
167 踅夜市 張清榮
168 阿姊去織布 林武憲

散文
170 手彈月琴好唸歌 人生路途自在行 葉文生
175 數念毛家莊園 吳南圖
185 塗豆1 甌5 角── tsah 飯包ê 囡仔時代 Lah-jih
190 了解家己佇時空中的所在 李 秀
193 佮你相約赤崁樓情‧奇遇記
── 2013 臺南藝術節特別報導 吳嘉芬
204 庭前生瑞草,好事不如無 游昌林
207 拍出咱的夢,鼓出阮的一片天 李盈萱

小說
210 請食晝 胡民祥

好冊分享
220 臺灣花間集 藍淑貞著

唸歌七字仔
222 獅虎貓抗日三猛歌 藍淑貞

臺語語文常識

241 南腔北調說臺語( 二) 編輯部
248 本用字佮教育部用字比較表 編輯部

252 編輯手記
253 徵稿
255 本刊誠品書店全國陳列地點
256 版權頁


【總編輯的話】
我來唸歌予恁聽 臺灣文化鬥陣晟1
文:總編輯 施炳華
 

臺灣有一種民間說唱藝術,號做「唸歌」、「歌仔」, 一个人手攑(giãh) 月琴,那(ná) 彈那唱,半唸半唱,音樂好聽,內容豐沛(phong-phài),聽有閣趣味。彈唱的(ê)早期是為著三頓、四界流浪獻藝的,有的是青盲(tshinn-mî) 的;後來是娛樂、商業性的演唱者。

啥乜是歌仔册?歌仔册也號做歌仔簿,是歌仔的唱本,就(tiõh) 是共唸歌寫做文字印做一本細細本的册;嘛有人創作歌仔、印做册,ah「唸歌先」才照歌仔册來唸唱。唸歌佮歌仔册是說唱、文本合一的,愛共伊看做是一體的;我共(kā) 伊的性質分做四部份來說明:
就(tsiū) 音樂來講,是運用固定的曲調,親像【江湖調】、【七字仔調】、【更鼓調】、【哭調】,佮其他的民間小調來演唱;就形式來講,是一聯四句(號做一葩[pha]),一句七字,四句全部押韻、抑(ah/iah) 是第三句無押韻、抑是二、四句押韻,用長篇敘事的方式來表現;就內容來講,是咧講一个完整的故事,親像《周成過臺灣》,抑是寓(gū) 言式的《戶蠅蚊仔大戰歌》,抑是臺灣社會新聞改寫的愛情悲歌,親像《台南運河奇案》,抑是四句聯式的《食新娘茶講四句歌》。就語言來講,因為是唱予(hōo) 一般民眾聽的,所以是使用日常生活講的話,親像「食咱夠夠」(欺壓我們到極點)、「知影」(知道)。一本歌仔册,有的單獨一集,有的分上下集,有的是四集,有的是六集、八集; 一集六頁,一頁(陰陽面)差不多是六百外字。

唸歌(抑是歌仔册)是「使用日常生活講的話」,這點是誠寶貴的文化遺產:語言有雅俗的分別:「雅」是讀册人的吟詠雅興,有學院派所追求的幼膩技巧;「俗」是一般人的口語俗言。俗的意思是通俗,毋是粗魯的意思。意大利的文學家但丁(Dante,1265 ─ 1321)《論俗語》:「所謂俗語,就是囡仔佇拄開始學話的時,按四箍圍的人學著的語言。……另外一種派生的語言,就是羅馬人號做文學語言的, ……干焦少數人會用這種言語,因為愛用足濟時間,刻苦學習才學會曉。這兩種言語,俗語是較高貴的,因為這是人類上早使用,是全世界攏咧使用的,……伊對咱是自然的,ah 另外一種是人為的。」2 按民間的立場來講,佇唸歌、歌仔册流行的六、七十年前、智識教育猶無足普遍的彼(hit) 當陣,「俗語是較高貴的」是有伊的真理,因為彼(he) 是人民實際生活、感情的表現,活跳跳的口語的書寫,值得咱來探討、重視屬於民間藝術的唸歌佮歌仔册。

唸歌、歌仔册先佇中國閩南流行,才閣流傳來臺灣,甚至有足濟人創作歌仔,出版歌仔册,慢慢成做臺灣本土的一種說唱藝術,表現臺灣的風土民俗、庶(sù)民的歷史觀、社會事件。按清朝道光初年到今(tann),歌仔册的出版數量有兩、三千本。民俗學家郭立誠(1915~1996) 講:「歌仔册是臺灣俗文學的寶藏。」(《民俗曲藝》16期,1982年)臺灣文史文獻收藏家杜建坊(1954~ ) 講:「歌仔册是臺、閩語的百科全書,會當(tàng) 提供各學門做種種研究。」(《歌仔册起鼓》47頁,臺灣書房有限公司,2008年)歌仔册除了對當時人民的娛樂、識字、教化有實際具體的效用以外,佇語音、詞彙、文學技巧、戲劇、社會、宗教禮俗、歷史各方面,嘛攏有真懸(kuân) 的價值。

臺語有文學無?過去佇以中國做中心、「推行國語,禁止講方言」的教育政策下,幾十年來,臺語一直夆(hông) 壓制,一般人煞誤叫是臺語無文學。臺語當然有文學,民間文學中,口傳文學──諺語、童謠、說唱、神話、傳說、故事佮歌仔等攏留傳佇活跳跳的口語中;書面文學──褒歌、歌仔戲劇本、布袋戲劇本、流行歌簿、歌仔册等攏經過有心人整理出版,尤其是歌仔册,數量閣較濟。毋拘,臺語長期受壓制,「唸歌先」賰幾个老--的,歌仔册愈來愈罕得看著,一般人煞毋知有歌仔册。好佳哉!這二十年來臺灣意識冲懸(tshìng-kuân),誠濟人關心、抄揣(tshiau-tshuē) 臺灣民間傳統的寶貝:「唸歌先」變做國寶──親像楊秀卿,學彈月琴唸歌的風氣當興(tng hing);唸歌的技藝按趁食轉做傳統技藝的傳承。嘛有袂少人咧整理、研究歌仔册,歌仔册是「臺灣語言、文學」的肥底。

毋拘,捌寶的無幾个,有能力解讀歌仔册的猶(iá/iáu) 閣是「鳳毛麟角」;因為歌仔册有伊特殊的書寫方式佮「多音交響」的臺語方言腔。

十外年前,我頭一擺看著的歌仔册,予人錯、別字滿滿是的印象,掀一、兩頁就擲(tàn)--咧,看無上目。後來較捷(tsiãp) 接觸民間文學,才覺悟「讀册人高高在上」的態度需要檢討,有一寡人目睭生佇頭殼頂,看袂著一般人的真實生活佮精神寄託。「文學的產生,總是按民間來的。」這是世界文學起源、發展的通例。

咱若欲研究民間文學,就愛知民間文學的書寫特色,伊的特色就是文字書寫無嚴格的規範;相對的,讀册人的書面文學是一種用字嚴格,要求音、義配合,是有長期音義演變系統的。歌仔是用唱的,是用白話(日常生活的語言)欲唱予大部份毋捌字的民眾聽的,所以歌仔册的書寫是以「記音」為主──而且是以白話為主。佇用字方面,雖然是用漢字書寫,除了依照漢字傳統的音、義以外,閣大量借用漢字的音來記口語的音──也就是使用「借音字」3;當然,猶有其他的借義字、俗字、自造字。讀册人若是堅持伊「用字嚴格」的原則,無欲敨(tháu) 開心胸來體會歌仔册唸唱、書寫的特質,致使看袂起歌仔册,就是面對寶山煞看做是糞埽(pùn-sò) 堆。

咱好好仔來欣賞保存臺灣文化的唸歌佮歌仔册。

註:
1. 鬥陣晟:音tàu-tīn tshiânn,一起、共同來栽培、養護。
2.《文學理論資料匯編》上372 ~ 373 頁,台北市:華諾文化事業公司出版,1985 年
3. 廈門博文齋書局《新編相箭歌》:「編歌重韻不重義,盡皆借音用土字,唱歌體會一點意,詳細讀書就知機。」